مشروع الخياطه من المنزل_ اسعار مكن الخياطه في مصر2022 _ نقل تجربه شخصيه عن مشروع الخياطه من المنزل _ عالم حواء

 

افضل مشروع علي الاطلاق ومربح 100٪

 

من افضل المشاريع علي الاطلاق هو مشروع الخياطه والتفصيل من المنزل 👌

 

عاوزه او عاوز تعمل مشروع بأقلّ الامكانيات ومن البيت  يبقي مشروع « الخياطه»  .. 

 

•  مشروع بسيط وجميل وممكن تبدأ فيه بأي مبلغ مش هيحددلك مبلغ معين وعلي اد شغلك وشطارتك المشروع هيعطيك... 

 ايه اللي ممكن تحتاجيه في مشروع الخياطه من المنزل  ! 

• كل اللي هتحتاجه في مشروع الخياطه من البيت:- 

1.  اول حاجه كدا وانت بتقول بسم الله هتحتاج مكن الخياطه اللي علي اساسه هتنفذ مشروع الخياطه من البيت .
2.   هتحتاج مكنتين خياطه عشان تبدء مشروع الخياطه من البيت صح ✅. 
3. وممكن تبدأها بمكنه خياطه واحده فالاول بس بعد كدا هتحتاج المكنه التانيه اللي هي مكنه اوفر عشان تسرفل كل شغلك وتنضفه ويبقي الفنش بتاع شغلك ممتاز .. 

 تعالو نشوف اسعار المكن وانواعه!!

• المكنه الاولي هي مكنه الخياطه العاديه اللي بنخيط بيها كل حاجه والافضل وانتي بتجيبي المكنه هاتيها زي مكن المصانع لانه مكن عملي وهيستحمل الشغل معاكي وهيعيش معاكي سنين،،

•  في طبعا مكن صغير وسعرو كويس وممكن تبدئي بيه عادي بس الافضل المكن الصناعي الكبير،،

•  تكلفه المكن الصناعي بيبدء من 3 الاف جنيه الي خمس الاف جنيه حسب النوع اللي يعجبك،،

• وعن تجربه شخصيه ليا انا كنت بستخدم مكنه صناعي «جوكي» «jouki» وحقيقي كانت جميله جدا معايا وعمليه ومريحه وبتستحمل الشغل لو عندك ضغط شغل،،  وكانت سعرها من حوالي 3 سنين حوالي  3800 جنيه.. 

• ممكن حاليا سعرها يكون من رنج 4000 الي 5000 الاف جنيه وبردو حسب النوع.. 

•  دا بالنسبه لو مكنه صناعي اللي هي مكنه الخياطه العاديه. 👌👌

•  طيب لو  حبيتي توسعي علي نفسك وتجيبي مكنه سرفله لانها هتساعدك جامد فالسرفله وانتي بتشتغلي في مشروعك من البيت هتقفل الشغل عشان شغلك يطلع مظبوط ،،  بدل متنزلي تسرفلي شغلك بره لا يبقي عندك مكنتك وتشتغلي عليها وتقفلي شغلك كويس فالبيت .. 

• مكن السرفله كتير وانواعه متعدده واسعارهم بتختلف علي حسب النوع،، 

1. في نوع جوكي بردو جميل جدا في منه بقي 3 فتله و4 فتله و5 فتله،، 
2.  كل واحده فيهم بسعر مختلف وبتختاري المكنه علي حسب التخصص اللي هتخصصي نفسك فالشغل فيه يعني في ناس بتحب تخصص نفسها فالبناطيل الجينز بس يبقي افضل مكنه ليها 5 فتله عشان الجينز تقيل،، 
3. طيب التخصص العادي سواء ملابس أطفال  او بناتي بس او ولادي اي كان بتستخدمي مكنه 3 فتله او اربعه الاتنين كويسين جداا.. 

•  انا كنت بستخدم جوكي 4 فتله وكانت ممتازه جدا فالشغل،،. 

 

سعر مكنه السرفله جوكي 4 فتله 4800 الي 5000 الاف جنيه. 

• مكنه سريعه وعمليه ومريحه وبتستحمل ضغط الشغل.. 

كدا اتكلمنا عن المكن وانواعه واسعارو والافضل 🙏

 نيجي بقي للشغل! 👌

•  هتشوفي نفسك مياله لايه اكثر لان الخياطه مجالاتها كتير جداا وتخصصاتها كتير..

• لو حبه انك تشتغلي فتفصيل الملابس ولسا معندكيش خبره فالتفصيل ابدئي دوري علي حد بيدي كورس تفصيل واتعلمي من الصفر وواحده واحده هتبقي استاذه مش بعيد انتي بعد كدا تدي كورسات ويبقي مشروعك ياستي. 🥰🙏

•  لو حبه تبدئي في مشروع تفصيل المفروشات ابدئي وهقولك المشروع دا جميل جداً  وربحه ماشاء الله 100 ٪  وعن تجربه شخصيه وسهل جدا مش محتاج كورسات بس انا بردو اخدت كورس فيه عشان اعرف ابدع فيه وادي الشغل حقه،،  مش بس كدا انا كمان اخدت كورس ازاي اقعد عالمكنه واشغلها واشتغل عليها لاني مكنتش بعرف اشتغل عليها نهائي اتعلمت واحده واحده وخطوه خطوه الموضوع محتاج خطوات عشان تعرفي تبدأي فيه ومحتاج صبر وتعليم فالاول عشان ينجح المشروع معاكي.. 

•  خدي كورس واتعلمي ولو لقيتي نفسك لسا شويه خدي كورس تاني ولو مش قادره تخدي كورس النت مخلاش حاجه اتعلمي عن طريق النت واحده واحده وطبقي وهتلاقي نفسك اتحمستي وهتبدئى تجربي فنفسك من اي حاجه قديمه عندك جربي فيها لغايه متحسي انك اتقنتي الموضوع وبقيتي تمام فالخياطه نبدء بقي نفكر فالقماش. 👌👌👌

• كدا عندنا المكن واتعلمنا يبقي نفكر فالقماش ونفكر هنجيبه منين وايه افضل الامكان اللي السعر فيها هيكون كويس وطبعا لازم تستخدمي خامات ممتازه عشان تكسبي زبون.. 

•  هتبدئي تنزلي تلفي علي المحلات وتشوفي تاجر جمله اسعارو كويسه وتتعاملي معاه وممكن بدل متسافري كل شهر تجيبي قماش او بضاعه تتفقي مع التاجر هو يجبلك اللي هتحتاجيه يبقي انتي وفرتي علي نفسك السفر والنزول كل شويه لان الشغل دا هيتحتاج منك قماش كتير وانك تنزلي تجيبي كل متحتاجي ان حبيتي انتي تنزلي بنفسك انزلي ولو مش هتقدري بتقولي اللي محتاجاه لتاجر الجمله وهو هيبعتلك،، 👌

 

طيب كدا حلينا مشكله القماش تمام وعرفنا هنجيب منين! 

•  كمان عاوزه اقولك ان في اماكن كثيره جدا فالقاهر زي شارع الازهر والرويعي والعتبه بيبيعو قماش جميل جدااا واسعار ممتازه التاجر اللي هيعجبك الشغل اللي عندو وارتاحتي لاسعارو اتعاملي معاه وخليه يبعتلك بعد كدا كل الشغل اللي تحتاجيه..

•   تمام كدا. 🌷👌

•  كدا ناقص تظبيط المكان اللي هتشتغلي فيه مشروع الخياطه من البيت. 👌✅

• هتحتاجي اوضه هتحطي فيه المكنتين ورفوف تحطي عليها القماش او استندات وطبعا لازم اضاءه الاوضه تكون كويسه عشان عنيكي متتعبكيش.. 

• ظبطنا الاوضه نبدء نشوف الادوات اللي هتحتاجيها فبدايه مشروعك وان شاء الله مش هتكلفك كتير

ما هي الادوات التي تحتاجها في مشروع الخياطه من البيت؟ 

1.  هتحتاجي مقص كويس للخياطه سعرو هيبدء من 80 جنيه الي 120 او 150 جنيه يتوقف سعرو علي حسب حجمه واستخدامه..
2. مسطره طويله مقاس متر..
3.  مازوره..
4.  ماركر او طباشير..
5.  خيوط بجميع الوانها عشان مش كل شويه تنزلي تشتري لون..
6.  دبابيس، وابر..
7. دي اهم الحجات اللي هتحتاجيها..
8.  طبعا لازم يكون عندك مكواه عشان تظبطي شغلك بيها عشان الشغل يطلع نضيف ومظبوط..

• طبعا اهم من الشغل تظبيط الشغل. ✔️✔️

• ⬅️ كدا ظبطنا كل حاجه خاصه بالمشروع:

•  ( المكن _ التعليم _ القماش _ الادوات _ المكان).
•  ناقص حاجه واحده بس وهي التسويق ✔️✔️✔️

• ⬅️ ازاي تسوقي شغلك لنفسك؟
• ⬅️ ازاي الناس تبدء تعرفك؟

•  عندك طريقتين للتسويق:

• اول طريقه عن طريق التسويق عبر الانترنت 👌✔️

•   هتعملي جروب وتبدئي تضيفي اصدقائك واصدقائك يضيفو اصدقائهم  وهتبدئى تعرضي شغلك وهتعرفي الناس انك شغاله وهيبدأو يجربو شغلك ولما يلاقو شغلك ممتاز والخامه المستخدمه جيده هيطلبو منك تاني وتالت وكمان هيبدأو يعرفو اصدقائهم واقاربهم عن طريق انهم هيشوفو منتجك عندهم ولو عجبهم هيطلبوه منك وواحده واحده هتلاقي الدنيا مشيت معاكي وبقت زي الفل.. 
• يعني ممكن يبقي مصدر رزقك عن طريق مواقع التواصل الاجتماعي فقط اون لاين..

• ثاني طريقه للتسويق: 

•  انك تعرفي جيرانك اللي ساكنين جمبك انك بتشتغلي وفاتحه مشروع خياطه فبيتك ويجربو شغلك ولو شغلك عجبهم هيعرفو بعض وهتبدئى تتعرفي فمنطقتك بهذه الطريقه...

• كدا اكون اقدمت لكم تجربتي الشخصيه ويارب اكون فيدتكم ..

               ✂️✂️✂️✂️✂️✂️✂️