طريقه اخذ مقاسات وخياطه طقم ملايه اطفال كورنيش جمب واحد

 طريقه اخذ مقاسات وخياطه طقم ملايه أطفال كورنيش جمب واحد 

في الموضوع السابق قمت بشرح كيفيه اخذ مقاسات وخياطه طقم ملايه كبير بكورنيش من ثلاث جوانب،  وكان شرح الطقم بطريقة سهله ومبسطه وسلسله.. 

واليوم سأقوم بشرح موديل جديد وشيك من اطقم الاطفال لكي تعطي بهجه لغرف اطفالنا.. 

⬅️ الحصه الثانيه من كورس تعليم  قص و خياطه وتفصيل المفروشات ( سماح جلال ).. 

طريقه اخذ مقاسات وخياطه طقم ملايه اطفال كورنيش جمب واحد

طقم اطفال كورنيش من جمب واحد. 

هياخد قماش اربعه متر ونصف مشجر. 

وهياخد 4 متر قماش ساده. 

 لعدد اثنين سرير مقاس 120  ، و 2خدديه مقاس 55×75 والخدديات عليها كرانيش، وعدد 2 مخده مقاس 120 كما هو موضح بصوره الطقم تماماً.. 

هتحتاجي كمان 5 متر من تُل الجوبير او كما يسمي فل او وردات جبير لتزيين الطقم. 

طريقه قص طقم الاطفال :- 

بًسِـمً أّلَلَهّـ أّلَرحًمًنِ أّلَرحًيِّمً.. 

هشرح علي سرير وطبقي نفس الكلام علي السرير الثاني. 

1. عندك قرصه السرير مقاسها 120 سم صح هتزودي عليهم 40 سم للجمب اللي بدون كرانيش هيبقي 160 سم. 
2. يعني هتقصي من المشجر 160 في عرض القماش ثابت لان عرض القماش لما بيتفررش بيبقي مظبوط وبيكون مقاسه 230 او 235 علي حسب نوع القماش. 
3. كدا هتقصي  160 سم مرتين مره  لقرصه السرير دا ومره لقرصه السرير التاني تمام.. 
4. من باقي القماش هتطلعي منه 4 شرايط مقاس من 15 سم ل 13 سم حسب رغبتك ودول هيكونو لطرف القرصه هيتركبو فوق الكورنيش الساده لكل سرير 2 شريط متشبكين في بعض.. 
5. كمان هتطلعي رسمتين علي شكل دولفين او علي شكل نقشه الطقم اللي عندك علي شكل دائره.. 
6. كدا خلصنا من قص القماش المشجر  ،،  ندخل بقي علي الساده.. 
7. هتقصي 90 سم لمخده وخدديه. 
8. و 90 سم كمان لمخده وخدديه. 
9. وبعدين كورنيش الملايه ثابت معانا فأي طقم كل كورنيش هياخد متر واحد من القماش والمتر بتقسميه نصفين كل نصف 50 سم وتشبكيهم في بعض وتكشكشيهم.. 
10. باقي القماش هتقصيه 8 سم شرايط علشان الكرانيش الخاصه بالخدديات.

طريقه خياطه طقم الاطفال:- 

1. اول حاجه ابدئى بالكرانيش،،  بعد مخلصتي كرنشتها هتبدئى تخيطيها فطرف قرصه السرير. 
2. بعد تركيب كورنيش الملايه خيطي الجوبير الورد فوق الخياطه الظاهره للكورنيش. 
3. كدا الملايه خلصت طبقي نفس الشغل علي الملايه التانيه. 
4. ندخل علي خياطه الخدديات خيطي اول حاجه الدائره علي شكل 🐬دولفين علي وش الخدديه و ركبي فوقيها كرانيش 8 سم داير ميدور عليها، وبعدين ركبي جوبير الورد عليها،، بعد كدا ال الشريط ال 8 سم اتني طرفه تنيتين رفيعين قبل الكرنشه وبعدين كرنشيها وقومي بخياطتها علي طرف وش الخدديه،  وبعدين حطي القلاب واتني طرفه وخيطيه،  وبعيدين ركبي واتني طرفه تنيتين وخيطيه الظهر فوق الكرانيش،  وطبقي نفس الكلام علي الخدديه التانيه. 
5. اخر حاجه المخددات  ،  انتي كنتي قصاها 90 سم عرض وطول 120، اتنيها نصين بحيث تكون 45 سم ابدئي بخياطتها وبعدين اتني كل طرف فيها تنيتين. 
6. اخر خطوه الاوفر شوفي اي حاجه فالطقم محتاجه تتعمل اوفر اعمليها سواء فكرانيش الملايه  او الخدديات او المخدات... 
7. واهم خطوه بالنسبه ليا هي انك تكوي الطقم كويس جدا ودا سر من اسرار التشطيب انك تشطبي طقمك وتكويه هيبقي اروع من الجاهز..

اتمني يكون الموضوع مفيد وتعم الفائده لكل محبي الخياطه والتفصيل..